Kapijaugutitsait ilonnainut inulimânut tikilulângitut atautsikut. Kapijaugutitsait pitagijangit nigiugijauvut ikittolâttut pigiannimi COVID-19 Kanimmasittâtailigekkutiup suliangujumut. Taimaimmat, pivalliataugiaKavuk kapijautitsigalagiamut, pigiannimi taikkua ulugianameluattut pigiasiviutautillugit attutausagaigajakKotunut COVID-19-namut, taikkua pimmagittumik uKumaittukoluagajakKotunut Kanimmasittâgiamut COVID-19 -namik, ammalu taikkua pimmagittitauvut tigumiagiamut prâvinsikkut silatsuami kiugianginnut.

Pivalliataujut Sivullipânga

Tainna sivullipât aullatitaujut COVID-19 kapputet pitaKajunut âkKisautinik tikisimalittut, ammalu aullatitauliaKilâlittut kajusiutigijaulluni 2020 tikijumut 2021. Tamakkua ilautitautillugit kapputet pitaKajunut âkKisiutinik pisimajumit Pfizer-BioNTech, ammalu Moderna.

Tigumiagasuagiamut pikKujalianik pisimajumit Nunatsualimâmi UKautjigiajet katimajinginnut ilinganiKajunut Kanimmasittâtailigiamut (NUkK), tânna sivullimi pitagijangit ilinganiKajumut COVID-19 kapputet iluani Newfoundland ammalu Labrador sivulliutitaulangavut taikkununga katingaKatigejunut:

• katingaKatigeKattajut iniKatlutik inutuKannut;
• ânniasiutiligijet suliaKattet ulugianaluattumejut attutaugiamut Kanimmasimmut COVID-19, ammalu taikkununga ilauluaKattajut silatsuami siammasimajunut kamaluaKattajut;
• JârikKutulualiaKijut; ammalu
• Inummaret aiviuttausiagunnangitunut NunaKakKâsimajut nunagijangit.

Iluani Pivalliataujumut Pigianningani, malittigetsialutik Kânganettunut katingaKatigejut immigolingajumik âkKisuttaulâttut, ilautillugit iniggautiKatsianginingit, piulimapvet ammalu kamagijaugiaKajunut suliagijaullagijaugialet, ammalu atuinnauningit kapputet pitaKajunut âkKisautinik. Ilonait piggautigijaulangavut sivulliutigasuagiangit KanimmasittâtailittâgiaKajunut immigolingajunut sivulliutitautillugit katingaKatigejunut, atautsikut asikkitailigiamut. Tâvatualli, maligatsaKammata piulimajautsiagiaKanningit suli amiakKuKappat pijagesimakKâtillugit piluattumik inigijaujumut. Napvâgiallagajangipata kapputitsanik, sakKititaungâgajattut immigolingajunut sivulliutitaugiaKajunut malittauKâlluni Pivalliataujumut Sivullipângani.

katingaKatigejut iniKatlutik inutuKait ilautitsivuk ilonnait inilet, suliaKattet ammalu niuggulagigialet ittuKautinni, immigut paigijauKattagialet aniggagijaujuni, nunalimmi paigijauKattajut anigganginni, ammalu ikajuttauKattagialet iniKajunut illualuni. NiuggulagiKattagialet isumagijaujunut, paitsiKattajunut iligenut, puttunippânguttitaugialet taikkununga nunalinnut paitsiKattajunut ammalu isumakkut Kanuikkunagit, ilautitsivuk ikajuttauKattagialet nigigiamut, aulagunnagiamut, upvalu immigut paigijauKattajunut, KaumaKatigennikut ikajuttauKattagialet, ammalu ikajuttauKattagiaKammijut asiKangitunik isumakkut piusigiKattajangit malunnaigutinnik.

Ânniasiutiligijet suliaKattingit  ilautitsivuk ilonnait suliaKattet akuni kamagijaugiaKaKattajunut, ittuKautinnejut, anigganginni paitsigiattuKattajut, ammalu nunalimmit ilautitsijumik aniggani suliaKattiuKattajut paitsigiattuKattajut. Iluani Pivalliataujumut Sivullipângani, Kanimmasittâtailigiamut sivulliutitaulangavut taikkununga ânnisiutiliginijiujut mânnaluatsiak nalunaittaujunut iluani puttunippâmik uluginattumejunut iniKaKattajunut ammalu taikkua atuniKatsiatut kajusiutigijaujumut COVID-19 kiuKattajunut. Tamanna ilautitsivuk suliaKattet ukunani suliaKaKattajunut:

1. COVID-19 ottugapvet ammalu KimiggutauKattajunut;
2. Tuavittumik suliaKapvet ammalu napvâKattajunut nutaganik illugusinginni (kamapvet illugusingit);
3. COVID-19 Kanimmasittâtailigiamut suliangujut;
4. COVID-19 inigijangit; ammalu
5. Pimmagittumik paigijauKattagialet inigijaujunut.

Tamanna malittigejut kapputet pitaKajunut âkKisautinik taikkununga ânniasiutiligijiujunut asiangugajattuk tânna COVID-19 ejaligijet ammalu kapputet suliagijauKattagialet iluani Newfoundland ammalu Labradorimi asianguvallianingani.

JârikKutujualiaKijut ilautitsivuk taikkua jârilet 85-imik ammalu jârikKutunitsait.

Aiviuttausiagunnangitut ammalu/upvalu NunaKakKâsimajuit nunagijangit ilautitsivuk First Nations ammalu Inuit nunagijangit iluani prâvinsimi taikkunani Kanimmasik siammalukagajanninga pitaKatsiangimut inositsiagittotitsigasuannimut tungavigijangit ammalu piusigijangit apomautigijaugajakKotunut ottugagiamut Kaningitogalagiamut asigijannit ammalu asigiallanik Kanimmasittâtailigasuagiamut ammalu aulatsisiagasuagiamut atuttaugajattut. Aiviuttausiagunnangitut nalunaitsivuk nunagijangit inet nunalet iniKammata ungatâni 350 kilometres inigijaujunit Kanittonitsamut kiggatotipvigijauKattajunut jâri nâtlugu akKutikkosonut ilonnainik silagijauKattajunut. Aiviuttausiagunnangitut Kaningitojut tukiKavuk nunagijangita iningani tingijokkut kisiani ammalu piujunik phonninik kiggatotilet, tâvatuak jâri nâtlugu akKutiKaKattangitut. Aiviuttausiagunnangitut ammalu Kaningitojut tukiKavuk nunagata ininga pitaKangitunut tingijokkogunnagiamut jâri nâtlugu ilonnainik silagijauKattajunut piusigijangit, ammalu phonniKatsialugatik nâautikkut kiggatotiKatsiangitunut.

Mânnaluatsiak, kapputet kisiani atuttaulangavut inummarinnut jârilinnut 16-nanik jârikkutunitsanullu ilinganiKajumut Pfizer-BioNTech kapputinnganik ammalu inummarinnut jâriKajunut 18-nanik ammalu jârikKutunitsanut ilinganiKajumut Moderna kapputinganut. Suguset ammalu inosuttut jârikinnisait 16-nanik pitâsongulâttut Kanimmasittâtailikkutigotitsanganik malittiluni ilagiallugit silatsuami kapputik ottugattausimakkâtilluni takutitsijumik tainna kapputik Kanuingimangât sivulli taikkununga jâriKajunut.

TUKIGIJANGA

Iluani Newfoundland ammalu Labradorimi, tânna anginippâk ulugianattuk ilinganiKajumut pimmagittumik COVID-19 siammagajanninga katingaKatigeKattajunut ininginni inutuKannut (ittuKautinni, immigut paigijauKattajunut anigganginni, nunalinni paivipvini, ammalu ikajuttauKattagialinnut inogiamut ininginni), ânniasiupvini, ammalu upvalu aiviuttausiagunnangitunut upvalu Kaningitumejunut NunaKakKâsimajut nunalinni pitaKatsiangitunut ânniasiupvini tungavigijanginni.

Tamannausimagaluattilugu Newfoundland ammalu Labrador ikittunik numaranik pitaKagaluatluni KanimmasiKajunut katingaKatigeKattajunut inutuKannut ullumimut, takusimavugut nanituinnak nunatsuatinni attuisiagajattuk taikkunani iniujunut, takusonguniattiluta unuttumaginnik tuKugagajattunut. Ammalugiallak, iniKajut taikkunani iniujunut jârikkutuluajunut amau piusiKasongutillugit Kanimmasimik anginitsamik pimmagittumillu ulugianattumeluasot ammalu tuKullutillu Kanimmasimmit COVID-19-namit. IniKajut, suliaKattet ammalu pimmagittumik niugguKattajut sivulliutitaugialet pigiannimi pitâmmata COVID-19 kapputinginnik siammatailititsigiamut ammalu pimmagittumik sakKigajakKotunut taikkunani inigijaujunut, ammalu uKilliumittigasuallugit ânniasiutiliginimmut piusigijanginni.

Ânniasiutiligijet SuliaKattingit sivulliutitaugialet suliaKanginnaKullugit suKusikkunagu, piumakKulugit ânniasiugunnagiamut, ammalu siammatitsitailigiamut Kanimmasimmik COVID-19 aittunattunik iluani ânniasiupvini. Taikkua suliaKattet sivulliutitaugialet kapijaugiamut pigiannimi kapputet tunijaulippata taikkua atutauluakKâgajammata kinatuinnamik KanimmasikKakKotumik COVID-19-namik ammalu aittuiniangimut uluginaluattumejunut immigolingajunut, upvalu tigumiatsiaKullugit malittaugiaKajunut prâvinsimi COVID-19 kiugunnagiamut, sollu taikku kapputinik aittuijunut COVID-19 ottugattauKattajunut ammalu sakKititsijunut COVID-19 Kanimmasittâtailigiamut. Asigiallait ânniasiutiligijet sivulliutitaulangavut unualuat kapputet atuinnautitaulippata.

Aiviuttausiagunnangitut upvalu Kaningitumejut NunaKakKâsimajut nunalet, ilautitsijumik First Nations ammalu Inuit nunagijangit, pitâgajangitut nâmmasiattumik kamagijaugunnagiamut ânniasiupvinik siammalukagajappat COVID-19. Tamannaugaluatlunillu aiviuttausiagunnangitut ilangit NunaKakKâsimajut nunangit kitakuluk paigijaugaluatlutik aittunattutâgiamut aittuigiamullonet, inulimât piusigijangit sollu ninniuKattajunut ammalu sakKijânginnatut inosinnut piusigijangit siammalukajuKagajappat angiluatlagajattuk. Newfoundland ammalu Labradorimi KanimmasijuKangilak aiviuttausiagunnangitunut upvalu Kaningitojunut NunaKakKâsimajut nunagijanginni ullumimut, ammalu taimâk tigumiagasuagialivut. Kajusiutigijaujut ilinganiKajunut Kanimmasittâtailigiamut iluani NunaKakKâsimajut nunagijangini suliagijaulangavuk ikajuttigetillugit taikkuninga NunaKakKâsimajut sivukkatigijangit.

Pivalliajuk kingulliani

Ilagiallugit sivulliutitaugialet katingaKatigejut nalunaittaulâkKut kapijaugiamut taikkua immigolingajut Kânganettut katingaKatigejut kapijausimakKâtillugit ammalu pitâgiallappata kapputinnik atuinnaulippatallu. Tigumiagiamut pikKujalianik pisimajumit NUkK, tamakkua ilautitsivuk:

• Ânniasiutiligijet SuliaKattingit ilautitaulungitut iluani Pivalliajumut Sivullipânganik;
• IniKajut ammalu suliaKattet ilonnainik asinginnilu katingaKatigeKattajunut inilet; ammalu
• AtuniKatsiamagittut suliaKattet.

Tamakkua ininginnejut tukitâttaulualâttut Kaujimajautsialippat pitjutigilugu sakKigajakKotunut COVID-19 kappijausimagettunut atuinnaulâttumut Pivalliataujumut kingulliani, ilautitsigiamut Katsinik kapijaujuKagiaKammangât, numaragijangit ammalu Kangatsiak kapputet atuinnaulâmmangâmmik, ammalu piulimapvet ammalu kamagijaugialinginnik.

Pivalliatauninga Pingajua

Ununningit immigolingajut ulugianaluttumejut sivulliutitaugialet katingaKatigejut kapijausimaligemmata, tainna kapputik pitaKajumik âkKisautimik sakKititaulâttuk ilonnainut kinalimânut. Nigiuvut nâmmatumik pitaKalânninginnik kapputinnik pitaKajunik âkKisautinik atuinnaulânninganik ilonnainut Canadami ukiatsângukKâtinnagut 2021.